Bang Media

Shakisha

FILM NYARWANDA

Polisi yakomeje igikorwa cyo gusiramura ku buntu

by www.igihe.info

Polisi yakomeje igikorwa cyo gusiramura ku buntu 
Mu rwego rwo gukomeza kurwanya no gukumira icyorezo cya Sida, Polisi y’u Rwanda, kuwa 21 Nzeli Polisi yakoze igikorwa cyo gusiramura abagabo ku buntu, mu karere ka Musanze.
Ubu bufasha mu by’ubuvuzi kimwe no gupima ku bushake ubwandu bwa Sida kikaba cyarakorewe Abapolisi bakorera muri ako Karere kimwe n’abagize urwego rw’Akarere rushinzwe umutekano DASSO ndetse n’ abafatanya na Polisi mu gukumira ibyaha (CPCs).

Iki gikorwa cyabereye ku biro bya Polisi mu Karere ka Musanze, cyaranzwe kandi n’ umukino w’umupira w’amaguru wahuje Abapolisi bakorera mu Ishuli Rikuru rya Polisi rya Musanze (NPC) n’ ikipe y’abamotari’ Umukino warangiye Abamotali batsinze Polisi ibitego 3 kuri 1.
Umuyobozi wa Polisi mu Ntara y’ Amajyaruguru, Chief Superintendent, Dismas Rutaganira, yashimye Polisi y’ igihugu kubera iyi gahunda nziza, akomeza avuga ko ari ngombwa ko abakora akazi ko kubungabunga umutekano bagira ubuzima bwiza kuko aribyo byatuma babasha kuzuza neza inshingano zabo.


Rutaganira yasabye abari bateraniye aho kugira uruhare mu kwirinda Sida n’ indwara zandurira mu mibonano mpuzabitsina, yanababwiye kandi ko ubuzima ari ingenzi, dore ko ntacyo umuntu yabasha kugeraho adafite ubuzima bwiza.


Yagize ati, “Icyorezo cya Sida ntabwo kigira ingaruka ku muntu ku giti cye gusa ahubwo izo ngaruga zibasha no kugera ku miryango ndetse bikanabangamira n’iterambere ry’igihugu.”
Yakomeje asobanurira abari aho ko iterambere ry’igihugu ritabasha kugerwaho mu gihe hakiri abenegihugu benshi bazahajwe na Sida. Yakomeje kandi abasaba kugira uruhare rukomeye mu kwirinda bene izo ndwara kugira ngo babashe kugira ubuzima bwiza ndetse n’ejo hazaza habo habe heza.


Superintendent Dr. Emmanuel Hitayezu, uyobora ikigo cyita ku basabitswe n’ibiyobyabwenge cyo mu Karere ka Huye, yasabye abari baje guhabwa izi serivise kujya bagira umuco wo kwipimisha buri gihe bityo kugira ngo babashe kumenya uko ubuzima bwabo buhagaze.
Bamwe mu bapimwe amaraso, bashimye iki gikorwa by’ umwihariko bakaba barashimiye Polisi y’ igihugu kuba yarabegereje izi serivisi.


Bene iki gikorwa kikaba kandi mu kwezi kwa Kanama tariki ya 22, cyarabereye no mu turere twa Rwamagana na Kayonza aho abatari bake bahawe izi serivise.


Izuba Rirashe 
Shyiraho Igitekerezo!

Related Posts by Categories



0 comments:

Post a Comment

 

Ubuzima

Urwego