Bang Media

Shakisha

FILM NYARWANDA

Umutekano:Tanzania ntishyigikiye ko FDLR iraswaho igiye yahawe kitageze

Umutekano:Tanzania ntishyigikiye ko FDLR iraswaho igiye yahawe kitageze
by www.igihe.info

Inkuru y’ikinyamakuru cyandikirwa muri Tanzania, The Citizen ivuga ko nubwo higeze kubaho ikibazo mu mibanire y’u Rwanda na Tanzania biturutse ku magambo ya Perezida Jakaya Kikwete, wavugaga ko hakwiye kubaho ibiganiro hagati ya leta y’u Rwanda n’umutwe wa FDLR, n’ubu Tanzania itigeze ihindura uruhande yariho. Ndetse umuyobozi utivuze izina avuga ko Tanzania idashyigikiye ko FDLR yamburwa intwaro igihe yahawe kitageze.
Iki kinyamakuru kivuga ko u Rwanda rwakomeje gusaba ko umutwe w’inyeshyamba za FDLR (uri ku rutonde rw’imitwe y’iterabwoba) wamburwa intwaro byihuse nk’uko byagendekeye umutwe wa M23 mu bihe bishize.
Ikifuzo cy’u Rwanda ariko ngo nticyakiriwe neza na Tanzania, Africa y’Epfo na Congo Kinshasa byose bidashyigikiye ko FDLR ikomeje kwidegembya yagabwaho igitero cya gisirikare.
Ibi bihugu kandi ngo bisangiye umugambi n’Umuryango w’Ubukungu muri Africa y’Amajyepfo (SADC).
Umutwe wa FDLR wahawe amezi atandatu ngo abawugize babe bamaze gushyira intwaro hasi ku bushake, iki gihe kikazarangirana n’ukwezi k’Ukuboza muri uyu mwaka.
Umuryango wa SADC ndetse n’Inama Mpuzamahanga mu karere k’Ibiyaga bigari (ICGLR) ngo bashaka ko ibitero byo gusenya burundu umutwe wa FDLR byakorwa nyuma y’igihe ntarengwa abagize uwo mutwe bahawe ngo babe barambitse intwaro hasi.
The Citizen ivuga ko amakuru yizewe ifite ari uko u Rwanda n’Umuryango w’Abibumbye (UN) bifuza ko ingufu za gisirikare zakoreshwa kuri FDLR ndetse na mbere y’igihe ntarengwa uyu mutwe wahawe.
Kugeza ubu abarwanyi 183 gusa nibo bamaze gushyira intwaro zigera kuri 200 hasi, inyinshi zikaba ziganjemo imbunda zishaje.
Mu rwandiko FDLR iheruka kwandikira SADC, ubu iyobowe na Perezida wa Zimbabwe, Robert Mugabe, FDLR, yahakanye ko abarwanyi bayo batakigiye mu mujyi wa Kisangani nk’uko byari byumvikanyweho mbere.
Iyo baruwa yasinywe n’umuyobozi w’izi nyeshyamba, Maj. Gen Byiringiro Victor, ivuga ko hari ibintu bitatu FDLR isaba kugira ngo itahe mu mahoro.
Uyu mutwe w’iterabwoba wa FDLR wasabye SADC kugira uruhare rugaragara mu nzira yo kugarura amahoro.
Wanasabye ko SADC n’Africa yunze ubumwe (AU) byagira uruhare mu kumvisha ibihugu by’Uburayi, America, Canada n’Ubwongereza ko bigomba gushyigikira amahoro mu Burasirazuba bwa DRC.
Iyo baruwa ya FDLR kandi yasabaga SADC na AU gukoresha imbaraga bifite mu kumvisha America n’Akanama k’Umutekano ka UN ko bigomba gushyira igitutu ku Rwanda rukemera kuganira n’uyu mutwe ushinja kugira uruhare muri Jenoside yakorewe Abatutsi.
Ibyo ariko ntibikuraho ko na n’ubu America, Umuryango w’Uburayi, na UN bigifata FDLR nk’umutwe w’inyeshyamba zikorera mu Burasirazuba bwa Congo kandi zagize uruhare muri Jenoside mu 1994.
N’ubundi kandi muri iyo baruwa FDLR yandikiye SADC yuririye ku magambo ya Perezida Kikwete avuga ko ikibazo cya FDLR n’u Rwanda kizakemuka mu nzira y’ibiganiro aho gukoresha ingufu za gisirikare.
Umwe mu bayobozi bo mu nzego zo hejuru zishinzwe umutekano mu gihugu cya Tanzania waganiriye na Citizen ariko ngo akaba atashatse ko amazina ye atangazwa, yavuze ko Leta ya Tanzania idashyigikiye ibitero bya gisirikare kuri FDLR.
Uyu muyobozi yagize ati “Uruhande turiho ni uko tudashyigikiye ingufu za gisirikare (mu kurwanya FDLR) mbere y’igihe ntarengwa cyashyizweho…nyuma y’icyo gihe tu (Tanzania) zafata undi mwanzuro.
Ikibazo dufite ni uko nyuma yo kunesha M23, inyeshyamba za FDLR, zimaze kumva ko arizo zitahiwe, zahisemo kureka imirwano ahubwo zikoresha abaturage nk’abo zishinzwe kurinda. Ibi byatumye gukoresha ingufu za gisirikare birushaho kugorana kuko ntiwabarwanya ngo ubure kwica abaturage b’inzirakarengane.”
Mu kwezi kw’Ukuboza 2013, ubwo umutwe wa M23 wari umaze gukubitwa inshuro n’Umutwe udasnzwe (UN Intervention Brigade), SADC na ICGLR byari byumvikanye ko iminwa y’imbunda ireba kuri FDLR n’indi mitwe y’inyeshyamba ya yogoje Uburasirazuba bwa DRC.
Gusa ubu muri iki gihugu cya DRC haracyabarizwa imitwe irenga 10 y’inyeshyamba, FDLR ikaba yaka imisoro ndetse ikagenzura ibikorwa byo gucukuru amabuye y’agaciro mu buryo butemewe n’amategeko.

UMUSEKE.RW
Shyiraho Igitekerezo!

Related Posts by Categories



0 comments:

Post a Comment

 

Ubuzima

Urwego