Bang Media

Shakisha

FILM NYARWANDA

Agahinda kagiye kunturitsa umutima :”Nabuze urubyaro,umugabo wanjye asigaye anca inyuma yifashishije whatsapp

Muraho neza, Amahoro y’Imana abe muri mwe. Mbanje gushimira uru rubuga ndetse n’abasomyi barwo ko badahwema kubaka imitima imwe yihebye igasubirana ibyiringiro ni muri urwo rwego nanjye nifuje kubagezaho ikibazo mfite ngo mungire inama kuko umutwe umwe ngo wifasha gusara gusa kandi ndabiginze mumfashe.
Ndabasaba inama ku kibazo ngiye kubavira imuzi

Ndi umugore ,ndubatse mfite umugabo tumaranye imyaka ibibiri. Twabanye mukunda cyane kandi nanubu ndamukunda ariko muriyo myaka ibiri nta mahirwe twagize yo kubona umwana kandi turacyamutegereje twihanganye.

Ikibazo rero mfite , hashize iminsi mbona umugabo wanjye yarahindutse bikabije . Ubundi mu busanzwe twari dukundanye cyane, dukumburanye mbese hari umubano ugaragara hagati yanjye nawe ariko muri y’iminsi ibintu byarahindutse. Ndamuhamagara ngo mubaze uko ameze mu kazi akabwira ngo ni busy(arahuze) araza kumpamagara ariko ntibibeho.

Nkongera nkohereza ubutumwa bugufi (sms ) ntayisubize ariko numva ko ari akazi nyine sinabitekerezaho cyane . Yananyitaba akabwira ngo nkupira nitabe umuntu ndaguhamagara nkaheba.

Byaje gukomera aho yaguriye telefoni igezweho (smart phone ). Kuva icyo gihe ahora ahuze cyane . Yaba atashye umwanya munini akawumara kuri chat za whatsapp . Umunsi umwe nza kugira amatsiko yo kumenya abo baba ba chatinga ( bagananira binyuze mu butumwa bugufi bohererezanya ) nsanga n’umukobwa bakorana muri company ( Ikigo ) imwe mbanza kubigenza gake .

Nyuma nza kubona message(ubutumwa) bandikiranye kuri chats umukobwa amushimira ngo” uri umuntu mwiza ngo nariye nanyweye nishimye” nabwo ndatuza. Ndavuga nti buriya ni ifunguro rya saa sita basangiye.Ibiganiro ( chats ) zarakomeje noneho nza gusanga aho umugabo wanjye yamubwiye ngo “uteye ubusambo” n’ibindi byinshi.

Umukobwa nawe ati ” Sha uziko koko unkunda !” Ejo rero nibwo nabonye gaheza ,umukobwa yaramwandikiye ngo” bite ko wabuze?nkeneye amakuru yawe kandi ndagukumbuye” arongera ati sha buriya narishimye” . Twari twicaye turi kureba umupira . Yari yansabye kumuherekeza kureba umupira kandi telefoni ye ninjye nari nyifite nuko nanjye nsubiza uwo mukobwa nti washimishijwe niki? Umugabo wanjye ahita abona ndi kuri chat ahita ayinyaka arakaye cyane , ndayimuha . Nyuma nongera kurebaho nsanga umukobwa yanshubije ati “nzakubwira turi kumwe” umugabo wanjye nawe aramusubiza ngo “sawa”

Nahise numva mbabaye cyane cyakoze ndihangana umupira urarangira turataha nagerageje guhisha amarangamutima yanjye kuko twari twajyanye na muramukazi wanjye. Tugeze mu rugo turi mu cyumba, nibwo nabimubajije ararakara cyane ngo mfata ibintu byo gutebya ( blagues )nkabiremereza ngo kandi kwirakaza no kwivumbura byanjye ngo ntibyamubuza kunca inyuma yabishatse .

Numva ngize umujinya n’uburakari bwinshi numva ko andambiwe ko ntarabyara mu gihe tumaranye, numva nta gaciro mfite mbese nanjye numva ndiyanze cyane.

Ariko kandi twabanye afite umwana yabyaye hanze. Twabanye mbizi kandi numvaga ntakibazo . Agakunda kuvugana nuwo babyaranye cyane kandi umwanya munini ariko numvaga ntacyo bintwaye kuko bagomba kuvugana ariko nkibaza umwanya bavugana nabyo bikanyobera.

Ikindi kandi ntamakuru yuwo mwana menya arampisha cyane kubijyanye nuwo mwana ntabashaka ko hari nicyo twavugana kuriyo ngingo. Ahubwo akanyumvisha ko mucyeka ngo kandi kumucyeka kwanjye ntibyamukura aho yagiye mbese akoresha imvugo yo kunyihebesha gusa.

Ubwo twaraye dutoganye cyane kuburyo bugaragara pe tubwirana amagambo atari meza cyakoze bucyeye namwandikiye musaba imbabazi kandi nisegura ku magambo mabi namubwiye . Kuva ubwo ntacyo yabivuzeho none amarira arenda kunyica aho mba ndi njyenyine nciduka amarira yamanutse.

Ubu sinkibasha gusura abantu kuko bambaza amakuru yanjye amarira akazenga mu maso iwacu ho barumiwe meze nkaho nabibagiwe atari uko mbanze ahubwo arukugirango batabona agahinda mu maso yanjye ,bagashavura .

None Papa wanjye yanyoherereje ubutumwa bugufi ambwira ko yifuza ko tuganira ngo ninshake umwanya musange kukazi tuganire ngo akeneye amakuru yanjye . None ndumva izo mbaraga ntazazibona zo kuganira na Papa kuko byonyine no gusubiza ubutumwa bwe byananiye ndarira.

None basomyi kandi nshuti ndabiginze ngo mubwire icyo nakora kuko nanijwe n’ubuzima bwanjye bwite .Kuba ntarabyara nuko mfite uburwayi kandi bukomeye, nkongeraho uwo mukobwa wiyongereye kuwo babyaranye ,hakiyongeraho ko umugabo atari kunyumva muri iyi iminsi none ndumva nta byiringiro mfite namba.

Ngerageza kujya gusenga Imana nagera munzu y’Imana amarira akambana menshi n’ijambo ry”Imana siryumve ubu nafashe icyemezo cyo kudasubira mu rusengero kuko abantu banyibazaho cyane. Ndihebye kandi mfite agahinda ndabinginze ngo mumbwire”Ese nkore iki? ngo urugo rwanjye rube uko narwifuje?


Shyiraho Igitekerezo!

Related Posts by Categories



0 comments:

Post a Comment

 

Ubuzima

Urwego